انتشرت عبر مواقع التواصل الاجتماعي، خلال الساعات الماضية صورة لسيدة مصرية تعمل في مجال توصيل الطلبات وهي تحمل طفليها على دراجة نارية، حيث نالت إعجاب عدد من المتابعين.
اسمها وعمرها
وحول تفاصيل الصورة فإن صاحبتها تدعى مريم حنفي تبلغ من العمر 27 عامًا، وقالت بدورها بحسب موقع القاهرة 24 :”أنا شغالة في المجال ده من سنة ونص، وتفاجئت بالصورة المتداولة عبر مواقع التواصل الاجتماعي، وتفاعل الناس مع الصورة، واللي كانوا معايا في الصورة دول ولادي كنت موصلاهم عند والدتي في منطقة المنيَل قبل الشغل.”
الأبناء
وأضافت: “إبراهيم ابني الكبير عنده 5 سنوات، وإسلام 3 سنوات، ومينفعش أخدهم معايا الشغل، ميستحملوش الشمس والحر”.
مؤهلها الدراسي
وتابعت :”أنا خريجة نظم معلومات إدارية، وحاولت كتير أشتغل في مجال دراستي ولكن لم يحالفني الحظ.”
زوجها
وأكملت مريم: “زوجي دايمًا بيشجعني ويدعمني في الشغل من يوم ما بدأت في مجال الدليڤري وتوصيل الطلبات، وهو شغال معايا في نفس المجال، والسكوتر بتاعي لو حصل فيه عطل هو اللي بيصلحه.”
ردود الفعل
وأضافت :”فيه ناس في الشارع بيخافوا لما يلاقوا واحدة ست هي اللي سائقة السكوتر، ولكن دول قليلين وردود فعل الناس تجاهي إيجابية طول الوقت في الشارع.”
واستطردت : “الناس متعرفش أنا اشتريت السكوتر ازاي، لسه لحد النهاردة بدفع أقساطه وبدفع في فلوسها، ده غير الأعطال اللي بتحصل معايا، ولكن كفاية عليَّ دعوات الناس ليَّ وكلامهم لما بيشوفوني في الشارع وأنا بوصل الطلبات، لأن كلامهم ده بيديني طاقة إيجابية ودفعة لقدام إني أكمل في الشغلانة دي”.
